ਦੇਵ ਥਰੀਕੇ ਦਾ ਇੰਗਲੈਂਡ ਪਹੁੰਚਣ 'ਤੇ ਨਿੱਘਾ ਸਵਾਗਤ....ਸਾਹਿਤਕ ਮਿਲਣੀਆਂ ਦਾ ਦੌਰ ਜਾਰੀ।

ਲੰਡਨ- {ਮਨਦੀਪ ਖੁਰਮੀ ਹਿੰਮਤਪੁਰਾ}ਪੰਜਾਬੀ ਗੀਤਕਾਰੀ 'ਚ ਬਾਬਾ ਬੋਹੜ ਵਜੋਂ ਜਾਣੇ ਜਾਂਦੇ ਹਰਦੇਵ ਦਿਲਗੀਰ ਉਰਫ ਦੇਵ ਥਰੀਕੇ ਵਾਲਾ ਦਾ ਇੰਗਲੈਂਡ ਪਹੁੰਚਣ 'ਤੇ ਸਾਹਿਤ ਪ੍ਰੇਮੀਆਂ ਵੱਲੋਂ ਭਰਵਾਂ ਸਵਾਗਤ ਕੀਤਾ ਗਿਆ। ਦੇਵ ਥਰੀਕੇ ਦੇ ਚਹੇਤਿਆਂ ਵੱਲੋਂ ਸਾਹਿਤਕ ਮਿਲਣੀਆਂ ਦਾ ਦੌਰ ਨਿਰੰਤਰ ਜਾਰੀ ਹੈ। ਜਿਸ ਤਹਿਤ ਦੇਵ ਥਰੀਕੇ ਨੂੰ ਨੇੜਿਉਂ ਜਾਨਣ ਲਈ ਮਾਸਿਕ ਮੈਗਜੀਨ ਦੇ ਸੰਪਾਦਕ ਡਾ: ਤਾਰਾ ਸਿੰਘ ਆਲਮ ਦੇ ਗ੍ਰਹਿ ਵਿਖੇ ਵਿਸ਼ੇਸ਼ ਮਿਲਣੀ ਦਾ ਆਯੋਜਨ ਕੀਤਾ ਗਿਆ। ਜਿਸ ਸਮੇਂ ਹਾਜਰੀਨ ਨੂੰ ਸੰਬੋਧਨ ਕਰਦਿਆਂ ਡਾ: ਆਲਮ ਨੇ ਦੇਵ ਥਰੀਕੇ ਦੀ ਸਾਹਿਤਕ ਦੇਣ ਸੰਬੰਧੀ ਸੰਖੇਪ ਚਾਨਣਾ ਪਾਇਆ। ਇਸ ਉਪਰੰਤ ਸਵਾਲਾਂ ਦੇ ਜਵਾਬ ਦਿੰਦਿਆਂ ਦੇਵ ਥਰੀਕੇ ਨੇ ਕਿਹਾ ਕਿ ਮੇਰੇ ਲਈ 'ਤਵਾ' ਸ਼ਬਦ ਰੱਬੀ ਨਿਆਮਤ ਵਾਂਗ ਸੀ, ਕਿਉਂਕਿ ਅਜੋਕੇ ਕੈਸੇਟ ਕਲਚਰ ਨੇ ਨਾ ਸਿਰਫ ਜੁਗਾੜਲਾਊ ਤੇ ਬੇਸੁਰੇ ਗਾਇਕ ਪੈਦਾ ਕੀਤੇ ਹਨ ਸਗੋਂ ਪੰਜਾਬੀ ਮਾਂ-ਬੋਲੀ ਦਾ ਵੀ ਮੂੰਹ ਮੁਹਾਂਦਰਾ ਬਦਲਣ 'ਚ ਵੀ ਕੋਈ ਕਸਰ ਬਾਕੀ ਨਹੀਂ ਛੱਡੀ। ਉਹਨਾਂ ਕਿਹਾ ਕਿ ਗਾਇਕੀ ਜਾਂ ਗੀਤਕਾਰੀ ਰਾਹੀਂ ਮਾਂ ਬੋਲੀ ਦੀ ਸੇਵਾ ਤਦ ਹੀ ਸਾਕਾਰ ਹੋਈ ਸਮਝੀ ਜਾ ਸਕਦੀ ਹੈ ਜੇ ਕਿਸੇ ਉਸਤਾਦ ਤੋਂ ਬਾਕਾਇਦਗੀ ਨਾਲ ਸੇਵਾ ਕਰਨ ਦਾ ਵੱਲ ਸਿੱਖਿਆ ਗਿਆ ਹੋਵੇ। ਉਹਨਾਂ ਕਮਪਿਊਟਰ ਤਕਨੀਕਾਂ ਜਰੀਏ ਗਾਇਕ ਅਖਵਾਉਂਦਿਆਂ ਦੀ ਤੁਲਨਾ ਬਿਜਲੀ ਵਾਲੇ ਉਸ ਪੱਖੇ ਨਾਲ ਕੀਤੀ ਜਿਸ ਦਾ ਬਿਜਲੀ ਨਾ ਹੋਣ 'ਤੇ ਕਿਸੇ ਨੂੰ ਕੋਈ ਫਾਇਦਾ ਨਹੀਂ ਹੁੰਦਾ। ਇਸ ਸਮੇਂ ਹੋਰਨਾਂ ਤੋਂ ਇਲਾਵਾ ਸਰਵ ਸ੍ਰੀ ਸੁਖਦੇਵ ਸਿੰਘ ਔਜਲਾ, ਲੋਕ ਗਾਇਕ ਹਰਵਿੰਦਰ ਥਰੀਕੇ , ਸਰਬਜੀਤ ਸਿੰਘ ਗਰੇਵਾਲ ਥਰੀਕੇ,ਖੇਡ ਲੇਖਕ ਜਗਸੀਰ ਧਾਲੀਵਾਲ ਨੰਗਲ, ਪੱਤਰਕਾਰ ਮਨਪ੍ਰੀਤ ਸਿੰਘ, ਪ੍ਰਦੀਪ ਸਿੰਘ,ਪ੍ਰਭਦੀਪ ਸਿੱਧੂ ਹਿੰਮਤਪੁਰਾ,ਗਾਇਕ ਰਾਜ ਸੇਖੋਂ ਆਦਿ ਨੇ ਵੀ ਦੇਵ ਥਰੀਕੇ ਨੂੰ ਜੀ ਆਇਆਂ ਕਹਿਣ ਮਾਤਰ ਵਿਚਾਰ ਪੇਸ ਕੀਤੇ।